Cerita Rakyat Bakumpai

Ui kawan hampahai samandeah. Tuh yaku umba mahalau. Kahalau jitu jida babarangah halau. Halau jituh sambil kia baparuman akan uluh are bahwasanya ada ije buku ji asal eh bi kula arep si Tumbang kanih. Gitang kuh buku jituh patut kia ingatawan itah. Tuh iye buku eh.

Kesah Bantus tuh kesah asal bi jaman batuh baneh, kesah uluh batuh ji paling hambalar, araie Bantus. Bantus hapanbelun dengan Umae ji jadi bakas kiya. Uluh ji kalebu hatawan ji aran Bantus te punae hambalar, gawiaie jida beken menter-menter balawu kuman batiruh.

Buhen pada ije andau parahatan Bantus menter sambil mamahera iye tangkejet hiau ada ji mangahau araie. Bantus munduk mangilau suara te dumah bi kueh. Tuh situh Bantus yaku mangahau ikau.

Bantus maningau kan lalungkang ji jida kejau pada ukan Bantus menter, si baun lalungkang te puna ada ji batang jambu, bidan bijambu te ada ji kungan burung darakuku. Bantus, sipet yaku Bantus auh burung jite. Limbah Bantus hatawan burung jite ji mangahau iye tenah Bantus hampuli menter hindai, kuler tumbah Bantus. Sipet yaku Bantus auh burung te hindai. Hamperepere burung te mangahau, kamuyakan maka kiya Bantus. Lalu inyipete burung jite tanggar lalu burung te manjatu kan petak. Bantus handak hampuli menter tapi burung te mangahau iye.

Impung yaku Bantus, auhe. Hamparere hindai burung te mangahau ahire maku kiya Bantus muhun kan petak mainpung burung darakuku ji buah sipet te. Lalu iandake si rahan luar handak ilihie, Bantus handak tane kan huang manangkuli menter. Tapi burung te mangahau dengan Bantus. Irek yaku Bantus, lalu belum apui inapui yaku Bantus, auhe.

Peda ingahau tarus ahire maku kiya Bantus. Ringkas kesah mansak pupuian maura-ura mawi kacar iweh Bantus.

Jida kawa maarit hindai Bantus lalu mangenta burung te. Sanjulu beh lepah ikinan Bantus. Puna jida inyangka burung ji halus tenah mampabensuh tanain Bantus, handak jida kawa hagerek kabensuhan. Jida kakueh Bantus marasa kapehe tanaie handak mamani. Iye tapaksa manggau ukan batanggar si likur dapur.

Alkisah jandau-jandau jida kamean sampai tukep ji bulen. Buhen waktu umae muhun kan rahan luar silikur te iye maalang dawen baluh dengan batange malancar subur banar. Umaie bainsek dengan Bantus. Bantus manumbah jida hatawan lalu. Padahal tumbu be asal eka tambuan tain Bantus. Baluh te malantar manjelar daweie hai banar.

Jida kakueh baluh te mangambang, kambang jadi putuk, putuk jadi bua. Sanjulu bua baluh te hai, sampai tandak sipetak puna limpat hai. Limbah jadi batue lalu inutik si Uma. Babehat banar uluh badue manggatang kan huang huma.

Bantus inyuhu badinu lading si Uma handak manyila baluh babaya tandak lading tau-tau baluh te basila kabuate, tangkejet jida sakira Bantus dengan Umae. Sebape si huang baluh te ada anak uluh pina baputi bahenda bahalap banar.

Bantus takang kilau hampagu, tapi si Uma barake iye maangkat anak kuluh te ji tanyata anak uluh bawi kilan jadi baumur telu nyelu. Limbah iangkat lalu anak uluh te manangis kilau tangis anak uluh halus kiya, impundunge kasukaan yaku supa anak auhe kahuaan. Lalu inpanduie limbah jadi barasih lalu inyapute. Sampai ji bulan anak uluh te mulai tau hapander dan mulai tau mananjung.

Nyelu kalawan nyelu bawi ji supa bi huang baluh te baubah jadi bawi bujang ji bahalap banar kilau bidadari. Bantus lembut mahamen panguler iye baubah jadi hatue ji rajin iye manduhup banar dengan Umae. Iye bagawi kantana muhun magilau laukkan sungei dan bakabun. Sahingga Uma Bantus jida kakurangan hindai, awen mulai belum mangat. Jida kakueh Bantus ingawinan dengan putri bi asal huang baluh te. Uluh lebu pada heran bawi dumah bi kueh sawan Bantus.

Ditulis Kembali Oleh Pambakal Banua Hujung Tanah (Adum M. Sahriadi)
Diambil dari Buku: BAHASA BAKUMPAI; STRUKTUR DAN IDENTITAS
Penulis : M. Hatta Baduani
Editor : Retno Inten ZA Maulani dan Setia Budhi
Cetakan : Pertama Januari 2005
Penerbit: CRDS Kalimantan